सुश्री वर्षा बालगोपाल
चित्रकाव्य
मेंदी… सुश्री वर्षा बालगोपाल ☆
☆
सांगते मेंदी कानी आज तिची सुरेख कथा गं
ऐक सखये तू सुद्धा मेंदीची ही गाथा गं||
*
शेवाळी हिरवे पावडरचे रूप बालपण सांगते
आठवणीतूनी तिच्या याच माहेरपण डोलते
पाण्यामध्ये मिसळताच सांगे सासरी जाणार आता गं
ऐक सखये तू सुद्धा मेंदीची ही गाथा गं||
*
मेंदी सजली हातावरी जशी पोर आली सासरी
लालीमा देत हाताला सूरात नाहली पावरी
सहजता भरली त्यामध्ये जसा हले पापणीचा भाता गं
ऐक सखये तू सुद्धा मेंदीची ही गाथा गं||
*
उतरला रंग तरी थोड्या खुणा वार्धक्य हे आले बाई
दुजाचे जीवन खुलवायचे सांगे थकायचे मुळीच नाही
नव्या दमाने येईन अवचित पुसून ही जाता गं
ऐक सखये तू सुद्धा मेंदीची ही गाथा गं||
*
तीन अवस्था या जरी माझ्या आहेत तुझ्यापरी गं
जगून घे सासरी पोरी रंग जीवनी भरी गं
सार्थकी लागेल जिणे तुझे चटके सोसता सोसता गं
ऐक सखये तू सुद्धा मेंदीची ही गाथा गं||
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
काव्यानंद 
ध्यास…
