Tag: #मराठी-कविता

श्री प्रमोद वामन वर्तक  

 कवितेचा उत्सव 

☆ 🙏 जरी वाजले सूप…! 👍 ☆ श्री प्रमोद वामन वर्तक ☆

☆

आली आली म्हणता

येवून सरली दिवाळी,

ठेवा डब्यात माळ्यावर

आता शिल्लक रांगोळी!

*

चिवडा चकली शेवेचा

उरला असेल जर चुरा,

करून सुट्टीत मिसळ

घरातच तो वापरा!

*

लक्ष्मी पूजनाचे ताट

ठेवा नीट सांभाळून,

पुढच्या वर्षी दुप्पट

भर घालायचे ठरवून!

*

फटाक्याच्या धुरात

पुन्हा पैसे नका टाकू,

अनाथालया दान देण्याचे

मनांत ठरवून टाकू!

*

जरी संपला दीपोत्सव

ठेवा तेवत स्वप्नांचे दीप,

निर्धार करुन स्वप्नपूर्तीचा

जगी मिळवा मान खूप!

जगी मिळवा मान खूप!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री दिवाकर बुरसे

 मनमंजुषेतून 

☆ चटका लाऊन निघून जा… ☆ श्री दिवाकर बुरसे ☆

☆

गिरिशिखरीचा नसुदे चंदन

झुडुप तरी हो दरीतले

झुडुप असे हो ज्याला पूर्वी-

कुणी कधी ना बघीतले।।१।।

*

झुडुपही नाही होता आले

इवले हिरवे गवत तरी

गवत असे देखणे, जणू की-

शालू हिरवा जरतारी।।२।।

*

अथांग सागर दूर राहु दे

गर्द निळे कासारची हो

वटवृक्षाची नसे अपेक्षा 

हरि अधरीचा वेळू हो! ।।३।।

*

सारे सेनापती कशाला

कुणी शिपाई हवेत ना

‘शिवबाला‘ही सवे लागती

गड जिंकाया कुणी ‘ताना‘।।४।।

*

काष्ठशिल्प उतुंग उभविण्या 

लघु लघु खणखर खिळे हवे

संगमरवरी ‘ताज‘ बांधण्या

क्षुद्र चुन्याचे कणहि हवे।।५।।

*

जसा लागतो शिल्पि तैसा

भार वाहण्या गर्दभही

राजसूय संपन्न व्हावया

शुष्क लागती समिधाही।।६।।

*

राजमार्ग होणे ना जमले

हो एखादी पाउलवाट

चंद्र-सूर्य, जा ठेव बाजुला

हो तारा घनदाट नभात।।७।।

*

आकारावर कधी न ठरते 

महत्व कुठल्या गोष्टीचे

तृणभारे अन् केशरकाड्या

एक दराने तुलायचे? ।।८।।

*

जे वाट्याला आले काही

अनन्यभावे करीत जा

ईश्वरसेवा मानुनि सारी

श्रमभक्तीतचि रंगुन जा।।९।।

*

रंगरंगता रंग धुंद ते

सवंगड्यांवर शिंपित जा

आणि अचानक संघामधुनी

चटका लाउन निघून जा! ।।१०।।

*

(‘Be the best of whatever you are’ या ‘Douglas Malloch’ यांच्या मूळ इंग्रजी कवितेने प्रेरित होऊन केलेली ही रचना आहे.) 

© श्री दिवाकर बुरसे

पुणे

संपर्कः ९२८४३००१२५, ९५५२६२९२४५

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

  चित्रकाव्य  

दर्पण…  सुश्री नीलांबरी शिर्के ☆

☆

सृष्टीस मोह झाला

प्रतिबिंब पाहण्याचा

कंठात हार घाली

पितस्वर्ण फुलांचा

*

पाण्यात पाहताना

प्रतिबिंब ती स्वतःचे

पाणीही जाहले स्तब्ध

दर्पण होई जलाचे

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री मंजिरी येडूरकर

 कवितेचा उत्सव 

☆ निसर्ग ☆ सौ. मंजिरी येडूरकर ☆

☆

मज दावितो निसर्ग, रोज वेगळेच भास

शाळाच भरवितो जणू, ऋतूंचीच खास

*

येता वसंत कोकिळ, खुलवितसे शिवार

येईल पानोपानी, फुलवेलींना बहार

*

बेचैन होतसे मी, ग्रीष्मातल्या झळांनी

बसलाय शुष्क चातक, चोचीस फुलवोनी

*

चैतन्य देई वर्षा, नटली वसुंधरा ती

उघडे निळा पिसारा, मन मोर नाचताती

*

आकाश स्वच्छ होता गीत रंगले खगांचे

शरदात पांघरते, नभ वस्त्र चांदण्यांचे

*

बोचऱ्या हिवाचा, नको पहाटेस स्पर्श

हेमंत येई घेऊनि, शेकोटीचा ग हर्ष

*

अति रुक्ष पानगळ, शिशिरात होतसे ती

अंकुर नाही डोई, तरी वृक्षास नाही भिती

*

वाट पाहतो हा, उरी घेऊनि मनिषा

येईल पुन्हा वसंत, बहरेल माझी आशा

☆

© सौ.मंजिरी येडूरकर

लेखिका व कवयित्री, मो – 9421096611

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ राधिका भांडारकर

 कवितेचा उत्सव 

☆ “हा छंद जिवाला लावी पिसे...” ☆ सौ राधिका भांडारकर ☆

☆

धुंदमनी एकाकी मी गातो

देहभान विसरुनी जातो

नाद पैंजणी तुझाच भासे

हा छंद जिवाला लावी पिसे।ध्रु।

*

मंद वारा कसा बिलगतो

गंध स्पर्श तुझा जाणवतो

मिठीत यावे वाटतसे

हा छंद जिवाला लावी पिसे..

*

तव दिठीतली तेजकळी

कपोली लाजरी एक खळी

आठवून मी बेभान असे

हा छंद जिवाला लावी पिसे..

*

डाव तो खट्याळ पावसाचा

आरस्पानी देह लावण्याचा

प्रणयात जीव गुंततसे

हा छंद जिवाला लावी पिसे..

*

हरित पानी पीत बहावा

बेचैन करी तुझा दुरावा

टिपुर चांदणे नभी हसे

हा छंद जिवाला लावी पिसे..

☆

© सौ. राधिका भांडारकर

ई ८०५ रोहन तरंग, वाकड पुणे ४११०५७

मो. ९४२१५२३६६९

radhikabhandarkar@yahoo.com

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

कल्पवृक्ष आहे मोह सौ.रेणुका धनंजय मार्डीकर ☆

 (अष्टाक्षरी)

☆

तुला पाहून मनाला

माझ्या पडतो ना मोह

असा सुगंध देणारा

कल्पवृक्ष आहे मोह

*

मोठ्या मोठ्या पानांमध्ये

पांढुरकी छान फुले

येता वाऱ्याची झुळूक

झुबक्यात पहा खुले

*

रात्री उमलती सारे

किती झाडाखाली सडे

आदिवासींचा हा देव

सदा उपयोगी पडे

*

तेल बनतेच याचे

औषधेही बनतात

फळफुल पान सारे

उपयोगी गणतात

*

फुले लागतात गोड

प्राणी पक्षी खाती सारे

माणसाला झिंग चढे

मोहाचे या रंग न्यारे

*

खीर रोट बनवती

आदिवासी खाण्यासाठी

पर्यावरण राखतो

हवा शुद्ध देण्यासाठी

*

नावातच मोह आहे

मद्य बनते फुलांचे

आज मोहाचे केले मी

काव्यातून गाजेवाजे

*

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री वर्षा बालगोपाल

  चित्रकाव्य  

आता थांबायचं नाही…   सुश्री वर्षा बालगोपाल ☆

☆

कोणी टाकले दगड वाटेत

अडथळे उभे अडवायला ||

पाहिले उंच त्या आकाशाकडे

निर्मीत वाट लागे चालायला ||

*

धारेची मग मी झाले ओहोळ

अडथळ्यांना वळसे घालून ||

कपारीवरून झोकून दिले

मिरवले मग झरा होऊन ||

*

कितीतरी ते खड्डे बुजवले

कितीतरी गं काठ सजवले||

माझ्यासंगे ‘जीवन’ फुलवीत

सरीता झाले वाहत राहिले||

*

पुढे जायचा घेतला वसा मी

कुठेच आता थांबायचं नाय||

सागर होऊन दाखविणार

ध्येय मार्ग जरी दुर्गम हाय||

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. उज्वला सुहास सहस्रबुद्धे

 कवितेचा उत्सव 

☆ गहिवर… ☆ सुश्री उज्वला सुहास सहस्रबुद्धे ☆

☆

माहेर सोडून सासरी निघता,

गहिवरले मन माहेरासाठी!

सासरी गोतावळ्यात रमले,

गुंतून गेले मन संसारासाठी!

*

एक दिवस असा उजाडला,

निरोप द्यावा लागे लेकीला,

मन माझे गहिवरून आले!

पापणीआड झाकले पाण्याला! …

…

पाहून लाडक्या नातीला,

गहिवर दाटे माझ्या अंतरात!

गोजिरवाणी नात माझी,

जेव्हा जाते दूर देशात!

*

जिवलग अपुले दूर जाता,

मन गहिवरले कोणाला सांगू!

जीव गुंततो आप्तेष्टांमध्ये,

गहिवर मनाचा कोणास दावू!

*

प्रेम- जिव्हाळा नाती देती,

सुख दुःखाचे डोळ्यात पाणी!

गुंफत धागे या जीवनाचे,

गहिवरते मन भाव भावनांनी!

☆

© सुश्री उज्वला सुहास सहस्रबुद्धे

वारजे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

काव्यानंद

☆ तुका म्हणे – विठ्ठल गीती गावा … – अभंग रचना ☆ रसग्रहण – प्रा तुकाराम दादा पाटील ☆

☆ तुका म्हणे ☆

काव्यानंद

*

विठ्ठल गीतीं गावा विठ्ठल चित्तीं ध्यावा /

विठ्ठल उभा पहावा विटेवरीं //१//

अनाथांचा बंधु विठ्ठल कृपासिंधु /

तोडी भवबंधु यमपाश //२//

*

तोचि शरणागतां विठ्ठल मुक्तिदाता /

विठ्ठल या संतासमागमें //३//

*

विठ्ठल गुणनिधि विठ्ठल सर्व सिद्धी/

लागली समाधी विठ्ठल नामें //४//

*

विठ्ठलाचें नाम घेतां जालें सुख/

गोडावलें मुख तुका म्हणे//५//

– संत तुकाराम.

 *

तुका म्हणे

आपल्या आवडीच्या आराध्य दैवताचे गुणवर्णन करताना तुकाराम महाराज आपले देहभान विसरून त्यांच्या नामघोषात तल्लीन होऊन जातं असतं. विठ्ठलाचे नामस्मरण का करावे याची कारणे सांगताना महाराज म्हणतात ”

आपण आपल्या ध्यानीमनी विठ्ठल साठवावा. त्याची विटेवर समचरणात उभी असणारी मुर्ती मनचक्षु समोर सतत ठेवावी आणि आपल्या मुखाने त्याचेच गीत गात त्याचे गुणगान करावे. कारण तो अनाथांचा बंधु आहे. म्हणून त्याला दीनबंधू म्हणतात. तो करूणाकर आहे. कृपेचा सागर आहे. तो भवबंधच नाही तर आपल्या भोवती असणारे यमपाशही सहज तोडून टाकतो. तो शरण येणार-या भक्तास सहज मुक्ती मिळवून देतो. आणि संतांच्या संगतीत तो रममाण झालेला असतो. विठ्ठल सर्व गुणसंपन्न आहे. त्याच्या चरणीच आपण त्याचे नामस्मरण करत समाधीस्त झालो तर आपणासही सर्व सिद्धी प्राप्त होतील. विठ्ठलाचे नुसते नामस्मरण केले तरी सर्व सुखे मिळतात आणि मुखाला आपोआपच गोडी येते. अशी पराकोटीची भक्ती केल्याशिवाय ईश्वर प्राप्ती होत नाही.

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈