Marathi Kavita
श्री शरद कुलकर्णी
कवितेचा उत्सव
☆ आता असे वाटते… ☆ श्री शरद कुलकर्णी ☆
☆
प्रेम केले की इबादत
विश्व सारे हरवून बसलो.
बरबाद झालो खेळात या
प्रलोभनाला पूर्ण फसलो.
शायरी केली बदनाम झालो
जिंदगी उद्वस्त झाली.
भान आले जाग आली
नशाच सारी उतरुन गेली.
आता असे वाटते तरीही
पुनःपुन्हा जन्मास यावे.
प्रमाद ते पुन्हा करावे
परतून गुन्हेगार व्हावे.
☆
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
कवितेचा उत्सव
☆ पारिजातक… ☆ सुश्री नीलांबरी शिर्के ☆
☆
तुला भेटायला येताना वाटेत
प्राजक्ताच झाड भेटायच
आग्रहाने मला दोनचार फुल द्यायच
तीच फुले देऊन तुला
मी मुग्ध हसायची
प्राजक्ताची निर्मलता
तुझ्या वागण्या बोलण्यात असायची
फुल देणं नकळत घडत गेल
फुल घेता ,देता माझच
प्राजक्ताच झाड झाल
मिही लागले हळूहळू
पाना फुलांनी बहरायला
माझ्याला सुगंध लागला
वार्यावरती पसरायला
आता पारिजातक जातायेता
माझ्याकडे पहात मिस्किल हसतो
अभावितपणे माझ्याकडेच
दोन चार फुले मागत रहातो
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. रेणुका धनंजय मार्डीकर
चित्रकाव्य
प्राजक्ता आहेच थोडा असा… सौ.रेणुका धनंजय मार्डीकर ☆
☆
प्राजक्ता आहेच थोडा असा
कोवळ्या पाकळ्यांनी फुलणारा
वाऱ्याची हळूच झुळूक येता
हिंदोळ्यावर झुलणारा
*
रात्रीच्या अंधारात
शुभ्र फुलात डवरलेला
फांदी फांदीवर चांदणं जणू
अंगोपांगी मोहरलेला
*
प्रभातीच धावतो खाली
अंगणाच्या ओढीने
सुगंधी शुभ्र गालिचा
भूमातेला घालतो लाडीगोडीने
*
केशर कांती देठाने
रंगांची करतो उधळण
सडा पाहून प्राजक्ताचा
बेधुंद होते माझे मन
*
हळूच सांगतो कानात
अलगद उचल हं मला
पाकळी जर तुटली माझी
काळजात दुखेल हो तुला
*
सुगंधी जखमांना
घेऊन वावरशील कशी
तुटलेल्या पाकळीला सांग ना
मग सावरशील कशी
*
श्रीहरीच्या चरण कमलावर
विनम्र भावे नतमस्तक होताना
त्याच्या इतकच व्हावं कोमल
प्राजक्ताला ओंजळीत घेताना
*
क्षणात विरक्त होतो तो
सर्वस्वाचे दान देऊन
निर्माल्य होताना हा प्राजक्त
जातो गोड आठवणी ठेवून
☆
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सौ. ज्योती कुलकर्णी
चित्रकाव्य
देश आमुचा… ☆ सुश्री ज्योती कुलकर्णी ☆
(वृत्त : पादाकुलक)
☆
जय जवान हो जय किसान हो
शास्त्रीजींचा होता नारा
हिंद देश हा आहे न्यारा
असे तिरंगा अम्हास प्यारा
*
पोशिंदा हा धान्य पिकवितो
हलधर येथे कष्ट करीतो
रक्षण अपुले करण्यासाठी
जवान हाती शस्त्र धरीतो
*
चला शिकू या आपण काही
घेऊ थोडी जबाबदारी
मदत करू या पकडायाला
दिसले जर का भ्रष्टाचारी
*
घेत काळजी प्रदूषणाची
निसर्गापुढे सदाच वाकू
शत्रू सगळे मिळुनी शोधू
परकी शक्ती उखडू फेकू
*
विकास व्हावा सर्वांगाने
देशात हवी अम्हास शांती
मतभेदाच्या तोडत भिंती
घडवू आपण नवीन क्रांती
☆
कवयित्री : सुश्री ज्योती कुळकर्णी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. उज्वला सुहास सहस्रबुद्धे
☆ शब्द मनीचे… ☆ सुश्री उज्वला सुहास सहस्रबुद्धे ☆
☆
मन दुखावले,
शब्द मूक झाले!
ओलावले डोळे,
संवाद न बोले!
*
अंतरात भाव,
निखळ प्रेमाचा!
शब्द शब्द माझा,
असे हृदयीचा!
*
नसे वाट सोपी,
खाच खळग्यांची!
कशी पार करू,
वेस विचारांची!
*
भाव भावनेचा,
खेळ निरंतर!
चालला मनात,
जीवनी दुस्तर!
☆
© सुश्री उज्वला सुहास सहस्रबुद्धे
वारजे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३१६
☆ पेढे वाटू गावा… ☆ श्री अशोक श्रीपाद भांबुरे ☆
☆
अधरावरती ओठ टेकता मधुर च्युइंगम व्हावा
या ओठांनी त्याच ठिकाणी कायम आश्रय घ्यावा
*
त्या मुरलीची घून ऐकुनी वेडी झाली राधा
मला वाटते तिच्याचसाठी शिकून घ्यावा पावा
*
ओठ तसा तर मिटून आहे काही बोलत नाही
तरी अंतरी श्वास कसा हा तिचाच करतो धावा
*
प्रीत सागरी संगम व्हावा याच्यासाठी आम्ही
नदी किनारी दिल्या सोडुनी दोन कागदी नावा
*
पलंगासही आज लगडुनी मस्त चांदणे आले
मधुचंद्राच्या रात्री आम्ही कलश दुधाचा प्यावा
*
वर्षभरातच हलो पाळणा चैतन्याचा येथे
उदरामधुनी तुझ्याच सखये छावा जन्मा यावा
*
तुझ्या नि माझ्या अस्तित्वाची खूण वाढते आहे
आगमनाच्या नंतर आपण वाटुन खाऊ मावा
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीशैल चौगुले
कवितेचा उत्सव
☆ काव्यदर्पण… ☆ श्रीशैल चौगुले ☆
☆
भाव अंतरीचे उमटता मनी
साद हृदयात समेटतो ध्वनी.
*
दिशा नजरेत स्पंदनांचे शब्द
काव्य गुंफताना भावनांचे ऋणी.
*
बंध रेशमांचे सोयरिक नवे
भेट आयुष्याची आठवण जुनी.
*
ऋतू बहरात पाखरांची झेप
रंग संसारात पंखवेल वेणी.
*
ध्येय आभाळाचे गाठताना ओळ
धुंद लेखणीची भिजरी पापणी.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री तुकाराम दादा पाटील
कवितेचा उत्सव
☆ मी… ☆ प्रा तुकाराम दादा पाटील ☆
☆
नाही कधीच केल्या मजबूत योजना मी
करतो खुशाल आहे खोट्याच वल्गना मी
*
स्वातंत्र्य आज आहे झालाय कैदखाना
सोसून खूप थिजलो तेथील यातना मी
*
जमलेत गुंड सारे कोंडून मारणारे
थकलो करून आहे त्यांचाच सामना मी
*
वैरी बनून मजला जखडून टाखणा-या
दडपून टाकल्या त्या सा-याच वासना मी
*
झाले गुलाम सगळे विसरून हक्क त्यांचे
त्यांच्या कडून कसली घेतोय चालना मी
*
शोधून ही ठिकाणा ज्याचा मला मिळेना
ठेवू उगा कशाला त्याचीच कामना मी
*
ज्याच्यात प्रेम नाही आहेच दगड धोंडा
त्याच्या पुढे कशाची करतोय अर्चना मी
*
मी क्रोध जाळताना झालो मलूल तेव्हा
विसरून सर्व गेलो माझ्याच भावना मी
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री दीप्ती कुलकर्णी
कवितेचा उत्सव
☆ महत्व पदराचे… ☆ सुश्री दीप्ती कुलकर्णी ☆
(काव्यप्रकार : अष्टाक्षरी)
☆
तुझी सावली पदरा जपे अवस्थी अर्भक
थरी मायेचा पदर सदा बनतो रक्षक ||१||
*
कधी पदर रुमाल ठरे हात पुसण्याला
माझा ठरतो आधार नित्य मम मदतीला ||२||
*
पदराची बाब खास थोपवितो तो उन्हाला
माझ्या डोक्यावर येतो सावली ती धरण्याला ||३||
*
पदराच्या सावलीत सांगे हितगुज मन
असे अमाप विश्वास मुक्त होई मन तन ||४||
*
असो कसाही पदर सुती असो वा रेशमी
एक भाव जपे सदा साथ देतो तो नेहमी ||५||
*
पदराच्या सावलीत नसे कशाचीच भ्रांत
माया पाझरे अंतरी मन करतसे शांत ||६||
*
ममतेचा हा पदर छत्र होई सदा शिरी
होई सदा आश्वासक छाया धरी सर्वांवरी ||७||
☆
© सुश्री दीप्ती कोदंड कुलकर्णी
हैदराबाद
भ्र.९५५२४४८४६१
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अनिल वामोरकर
कवितेचा उत्सव
☆ कर्म… ☆ श्री अनिल वामोरकर ☆
☆
आपुलकीच्या
नात्याने
स्नेह जपावा
मनामध्ये
अन् चुकू नये कधी
कर्तव्यामध्ये…
नकोत केवळ
विटांच्या भिंती
स्वार्थ विरहीत
प्रेम असावे चित्ती…
येणा-याचे अगत्याने
स्वागत करु या
जाणा-याच्या मनात
ओढ वाटावी परतण्याची तया…
आज आहोत
उद्या नसू हयात
ओठी प्रत्येकाच्या
नामोल्लेख असावा तयात…
☆
© श्री अनिल वामोरकर
अमरावती
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
