Tag: #मराठी-कविता

नीलांबरी शिर्के

शुभदा भास्कर कुलकर्णी (विभावरी)

☆

पाऊले चालली 

पालखी संगती

ज्ञानोबा माऊली 

मुखे नाम घेती

*

आनंदाचा कंद

हरी नाम छंद

सारे वारकरी 

नाचले ही धुंद..

*

असूनी संसारी

केले पुण्य भारी

म्हणूनी घडली

आनंदाची वारी..

☆

कवयित्री : शुभदा भा. कुलकर्णी (विभावरी)

कोथरूड – पुणे, मो.९५९५५५७९०८

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास रघुनाथ पंडित

 कवितेचा उत्सव 

☆ हा किती बरसे घन... ☆ श्री सुहास रघुनाथ पंडित ☆

☆

रान ओले पान ओले ओलावले माझे मन

हा किती बरसे घन

* 

पावसाच्या या ऋतूला पंख फुटले पोपटी

तापलेल्या या धरेला प्रेम हस्ते थोपटी

मांडलेला हा पसारा घेई अवघा व्यापून

हा किती बरसे घन

 *

चित्र हे नयनांपुढे आज रंगांनी खुले

आसमंतातील गंधाने पहा हे मन भूले

श्याम रंगी मेघ बरसे चुंबूनी माझे मन

हा किती बरसे घन

 *

जीवनाचा स्पर्श होता जीवनाचा अर्थ उमगे

अंकुराचे रोप होता एक आशा पालवे

काल नव्हते चैतन्य जे ते आज आले कोठून

हा किती बरसे घन

☆

© श्री सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

ज्योत्स्ना तानवडे

 कवितेचा उत्सव 

☆ मृद्गंध ☆ सौ.ज्योत्स्ना तानवडे ☆

☆

सागर घनदाट मेघांचा उचंबळतो अंबरी

अतीव इच्छा त्यातुनी याव्या सरी वरती सरी ||

*

काळ्या करड्या फिकट पारव्या मेघांच्या या लाटा

 झाडांमधुनी जणू शोधतो वारा चोर वाटा ||

*

भिरभिर वारा पानांमधुनी छेडीतसे धून

क्षणात येते मळभ वेढुनी गायब होते ऊन ||

*

ऊन काहिली सोसेना तगमग हो जीवाची

तहानलेली सृष्टी पाहे वाटुली पावसाची ||

*

वृक्ष डोलती सळसळ पाने वारा धावत आला

सोबत घेऊनी मृद्गंधा सांगावा देता झाला ||

*

अंगे भिजली मने मोहरली थेंब आले आले

जलधारांनी सचैल सारे चिंब चिंब मन झाले ||

*

मृद्गंधाने धुंदी येई जलधारांनी तृप्ती

विश्व व्यापुनी अभंग राहे नभ मातीची संतृप्ती ||

*

(संतृप्ती म्हणजे संपूर्ण समाधान)

☆

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रतिमा रवींद्र कुलकर्णी

 

 कवितेचा उत्सव 

☆ पाऊस असा घनगर्द ☆ प्रतिमा रवींद्र कुलकर्णी ☆

☆

पाऊस असा घनगर्द बरसतो

 रातही काजळकाळी

का गीत असे ओठात माझीया

 असल्या भलत्या वेळी?

 

ते रुप पाहण्या नयने आसावली

मनमयूर नाचे वेडावून गोकुळी

मधुसूर बासरी करते मोहक खेळी

मन गंध-धुंद, कानात गुंजती,

 आज सख्याच्या ओळी…

 

घनव्याकूळ भेटी घडल्या कातरवेळी

अन तरंग उठती श्यामल यमुनाजळी

गारुड करीतसे अजुनी तो वनमाळी

का नीज नसे डोळ्यात?

 जाळते रात, अशी काजळी…

☆

© प्रतिमा रवींद्र कुलकर्णी

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

अरुणा मुल्हेरकर

 विविधा 

☆ मला समजलेली संत तुकारामांची अभंग गाथा… भाग – ३१ ☆ अरुणा मुल्हेरकर ☆

समर्पण

पांडुरंगाची निर्व्याज भक्ती करता करता तुकाराम महाराजांच्या तनामनात विठु माऊली विषयी समर्पित भावना निर्माण झाली आहे. त्यासंबंधी काही अभंगांचे आपण येथे विवेचन करण्याचा प्रयत्न करूया. तुकाराम महाराजांना सर्व जग विष्णुमय वाटते आणि साधकांनाही ते हेच सांगतात.

विष्णुमय जग वैष्णवांचा धर्म/

भेदाभेद भ्रम अमंगळ//

 आईकाजी तुम्ही भक्त भागवत/

 कराल ते हित सत्य करा//

कोणाही जीवाचा न घडावा मत्सर/

वर्म सर्वेश्वर पूजनाचे//

तुका म्हणे एका देहाचे अवयव/

सुखदुःख जीव भोग पावे//

ते असे मानतात की, सर्व जग, त्यातील सजीव प्राणी आणि निर्जीव जड वस्तू हे सगळेच विष्णुमय आहे असे जाणावे. एखाद्या दगडाला शेंदूर फासल्याने त्याला देवत्व येते ना? हाच वैष्णवांचा खरा धर्म आहे. भेद, अभेद, वाद

-विवाद म्हणजे भ्रम आहे. भागवत भक्त म्हणजेच भगवंताचे निस्सीम भक्त! तुम्ही हे ऐका आणि स्वहित करून घ्या असे संत तुकाराम कळकळीने सांगत आहेत. कारण ते स्वतः या अवस्थेपर्यंत येऊन पोहोचले आहेत. कोणत्याही जीवाचा मत्सर करू नये, त्यातच सर्वेश्वराचे पूजन आहे. पुढे महाराज सांगत आहेत की, सर्व जीव हे एकाच देहाचे अवयव आहेत, त्यांनी भोगलेली सुखदुःखे सर्वांच्या अंतर्यामी असलेल्या जीवालाच भोगावी लागतात. त्यामुळे दुसऱ्याला दिलेला त्रास किंवा त्याचा केलेला मत्सर पर्यायाने एका भगवंताचाच त्रास समजावा. भागवतात केलेला विश्वात्मकाचा उपदेश याहून वेगळा नाही. थोडक्यात सांगायचे तर ईश्वराप्रती स्वतःला वाहून घेण्याची ही कृती आहे.

या अभंगात महाराज स्वतःची मनोवस्था अधिक स्पष्ट करून सांगत आहेत. ते म्हणतात,

नींदी कोणी मारी/ वंदी कोणी पूजा करी//

मज हेही नाही तेही नाही/

वेगळा दोहीपासून//

देह भोग भोगे घडे/ जे जे जोडे ते ते बरे//

अवघे पावे नारायणी/ जनार्दनी तुकयाचे//

तुकाराम महाराजांची कोणी निंदानालस्ती करोत, किंवा कोणी त्यांना मारोत, (शब्दांचा मार)

कोणी त्यांना वंदोत नाही तर त्यांची पूजा करोत, त्यांना कशाचाच फरक पडत नाही. त्यांना त्याचे सुखही नाही किंवा दुःखही नाही. सुखाचे किंवा दुःखाचे सारे भोग दैववशात केवळ देहाला भोगावे लागतात. संत तुकारामांची देहबुद्धी नष्ट झाल्यामुळे जे काही बरे वाईट भोग आहेत ते एका जनार्दनाकडे, नारायणाकडे जातात. नारायणापाशी तुकाराम महाराजांच्या समर्पणाची ही अवस्था आहे.

सकळ चिंतामणी शरीर/

जरी जाय अहंकार समूळ आशा//

निंदा हिंसा नाही कपट देहबुद्धी/

निर्मळ स्फटिक जसा//

मोक्षाचे तीर्थ न लगे वाराणसी/

येती तया पासी अवघे जन//

तीर्थासी तीर्थ झाला तोची एक/

मोक्ष तेणे दर्शने//

 मन शुद्ध तया काय करीसी माळा/

 मंडित सकळा भूषणासी//

हरीच्या गुणे गर्जताती सदा/

आनंद तया मानसी//

तन मन धन दिले पुरुषोत्तमा/

आशा नाही कवणाची//

तुका म्हणे तो परिसाहुनी आगळा/

काय महिमा वर्णू त्याची//

या अभंगात तुकाराम महाराज संतांचा महिमा सांगत आहेत. ज्याचा सर्व अहंकार विनाश पावला आहे, निंदा, हिंसा, कपट, देह बुद्धी ज्याच्यामध्ये जराही उरली नाही, तो स्फटिका समान निर्मळ आहे. त्याचे सर्व शरीर जणू चिंतामणी आहे. मोक्ष देणारे तीर्थ काशीला जाण्याची त्याला आवश्यकता नाही. उलट सर्व तीर्थ अशा पुरुषा पाशी येतात. कारण सर्व तीर्थाना पावन करणारा तो स्वतःच एक तीर्थस्थान झाला आहे. त्याच्या दर्शनाने मोक्षप्राप्ती होते. ज्याचे मन शुद्ध आहे त्याला जपमाळ ओढायची काही आवश्यकता नाही. तो स्वतः सर्व भूषण मंडित आहे. जो सतत हरीचे गुणगान करीत नामघोष करतो तो निरंतर आनंदातच असतो. ज्याने आपले तन, मन, धन पुरुषोत्तमाला अर्पण केले आहे, तो परिसापेक्षाही श्रेष्ठ आहे. तुकाराम महाराज हे स्वतः अशाच पुरुषांपैकी एक आहेत, म्हणून तर आपण त्यांना संत तुकाराम असे ओळखतो.

तुकाराम महाराजांना सर्वत्र एक पांडुरंग दिसत आहे. ते म्हणतात—-

दाता नारायण/ स्वयेभोगीता आपण//

आता काय उरले वाचे/ पुढे शब्द बोलायचे//

देखती जे डोळे/ रूप आपुलते खेळे//

तुका म्हणे नाद/ झाला अवघा गोविंद//

सर्व प्राण्यांना सर्वकाही देणारा दाता दुसरा तिसरा कोणी नसून नारायणाच आहे आणि त्यांना मिळालेल्या सर्व वस्तूंचा भोग घेणाराही तोच आहे. याचाच अर्थ असा की तुकाराम स्वतः नारायणमय झाले आहेत आणि त्यांच्याकडे असलेल्या प्रत्येक गोष्टीचा भोग ते म्हणजे नारायण घेत आहे. अशा परिस्थितीत मी मिळवले, मी भोगले असे म्हणायला जागाच उरत नाही. जिकडे पहावे तिकडे त्यांना नारायणाचेच रूप दिसते. (या ठिकाणी भक्त प्रल्हादाची आठवण आल्याशिवाय राहत नाही.)

नर आणि नारायण यामध्ये भेद असा राहिलेलाच नाही. जेवढा शुद्ध नाद आहे, तेवढा गोविंद झाला आहे.

म्हणून खेळ मांडीयेला ऐसा/

नाही कोणी दिशा वर्जीयली//

माझिया गोते हे वसले सकळ/

न देखी जे मूळ विटाळाचे//

करुनी ओळखी दिली एकसरे/

न देखो दुसरे विषमासी//

तुका म्हणे नाही काळापाशी गोवा/

स्थितीमति देवावाचुनिया//

वरील अभंगात तुकाराम पुन्हा एकदा स्वतःच्या स्थितीविषयी बोलतात. ते म्हणतात, ” मी असा खेळ आरंभला आहे की त्यामध्ये कोणतीही दिशा वगळली नाही. सर्व दिशा शुभ आहेत. पांडुरंग हाच माझे सर्व गणगोत आहे. त्याने सर्व जग व्यापले आहे, त्यामुळे विठ्ठलाचे मूळ जो भेदभाव तो माझ्या ठिकाणी उरलाच नाही. सर्वत्र पांडुरंग ओतप्रोत भरलेला आहे, अशी त्याने स्वतःच्या स्वरूपाची मला ओळख करून दिल्यामुळे मी त्याच्या स्वरूपा वाचून दुसरे काही पाहू शकत नाही. आता माझे मन काळाच्या कल्पनेत सापडलेले नाही की गुंतलेले नाही. मी कालातीत अशा देवाच्या स्थितीमध्येच माझ्या बुद्धीसह एक झालो आहे. “

तुकाराम महाराजांचा देहाभिमान संपूर्ण तया गळून पडला आहे, परब्रम्हाशी ते एकरूप झाले आहेत.

या संदर्भात आणखी काही अभंगांचा परामर्श आपण पुढील लेखात नक्की घेऊ.

क्रमशः… ३१ 

© अरुणा मुल्हेरकर 

डेट्राॅईट (मिशिगन) यू.एस्.ए.

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

श्री प्रमोद वामन वर्तक  

  चित्रकाव्य  

स्त्री हट्ट!   श्री प्रमोद वामन वर्तक ☆

☆

हट्ट कसा करायचा ते 

बायकांनाच कळतं,

पक्षी काय मानव काय

यात त्यांचंच फावतं!

*

पंख पसरला उन्हात

थंड ठेवण्या डोके प्रियेचे,

रग लागली पंखाला

सांगू कसं आता वाचे?

*

जरी धरे छत्र प्रियेवरी 

राग पहा नयनातला,

समस्त नवऱ्यांना कळावा

भाव त्याच्या मनातला!

भाव त्याच्या मनातला!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डॉ. स्वाती पाटील

 

  चित्रकाव्य  

  – सृजनानंद –  ☆ डॉ. स्वाती पाटील ☆

☆

ओढ म्हणू की आनंदाची शिरशिरी

अंगातून वाहते तरंगाची थरथरी

हसले उन्हात चांदणे या वनांमध्ये

लेऊन रंगांची रंगबिरंगी मखमल सुंदरी

*

थुई थुई नाचतो झुकतो थोडा पुढे

कळेना राणी मज शोधू तुला मी कुठे

ओढ दाटली मिलनाची तुझ्या ग सखे

बरसतो मनी मल्हार का कोडे अता सुटे

*

हा संभार नाही केवळ मिलनाचा गडे

निळे निळे लक्ष डोळे तुझ्या वाटेकडे

येशील कधी पाहतो वाट आसमंत हा

मागेन आता हे सृजन सडे मी नभाकडे

☆

© डॉ.स्वाती पाटील

सांगली

मो.  9503628150

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈